BUTUAN CITY – Nagpasidaan ang World Health Organization (WHO) nga ang ilang mga ospital sa Lebanon posibleng mahutdan og life-saving trauma medical kits sulod lamang sa pipila ka adlaw human sa daghang casualties gikan sa padayon nga Israeli strikes.
Sumala ni WHO representative Dr. Abdinasir Abubakar, paspas kaayo nga nahurot ang trauma supplies sama sa bandages, antibiotics, ug anesthetics tungod sa kalit nga pagdagsa sa mga samaran, kadaghanan mga sibilyan.
Sigon pa niini nga kung adunay mosunod nga mass casualty incident, posible pa gyud nga mosamot ang krisis sa mga ospital tungod sa kakulang sa gamit ug tambal.
Dugang pa sa WHO, bisan ang mga tambal para sa chronic illnesses sama sa insulin posible usab nga mahurot sa mosunod nga mga semana tungod sa naputol nga supply chains ug nagkataas nga gasto sa delivery.
Sa pagkakaron, nakig-coordinate ang WHO ug ang Lebanese health authorities aron ibalhin ang nahabiling suplay ngadto sa mga ospital, apan giangkon niini nga grabe na kaayo ang kalisod nga giatubang sa health system tungod sa nagpadayon nga krisis.
