BUTUAN CITY- Gikakorat nalang sa tag-iya sa baboyan nga si Junard Quilario ang kalit nga pagbisita sa mga opisyal sa barangay ug kawani sa Environment and Natural Resources Office kon ENRO sa ilang panimalay, nga walay klarong pahibalo o eksplanasyon sa ilang tuyo.
Sumala kaniya, niadtong Marso 30, kalit lang misulod ang mga taga-barangay samtang siya naglimpyo, apan wala’y gipadayag nga katuyoan ug mihawa ra usab. Paglabay sa pipila ka semana, niadtong Abril 6, mibalik sila uban ang mas daghang personnel lakip ang usa ka nag-uniporme nga mipaila nga gikan sa ENRO aron mag-inspeksyon sa ilang baboyan tungod sa giingong reklamo sa baho.
Bisan pa niini, nagpasabot si Quilario nga wala sila’y nadawat nga opisyal nga reklamo o pahibalo, ug wala usab gipatin-aw kung unsa ang ilang nalapasan, samtang nagpadayon ang sunod-sunod nga inspeksyon lakip ang pagbisita sa City Health, nga hangtod karon wala pa’y gipagawas nga resulta.
Dugang pa niini nga sugod karun ipangdispose na matud pa niini ang iyang mga binuhing baboy o ibalhin aron walay makasimhot sa baho sa baboy ug aron makalikay sa kasamok. Gi-awhag usab niini ang tanan nga kung aduna matud pay reklamo, ipaagi matud pa sa hustong proseso ug komonikasyon aron magkasinabot hilabi na nga bisan magkina-unsa mo sunod matud pa sila sa balaod.
