BUTUAN CITY- Gi-ingong puros bakak ug walay kamatuoran, sumala ni Senator Imee Marcos kalabot sa mga pamahayag ni Ramil Madriaga sa nahimong impeachment proceedings sa kamara batok kang Vice President Sara Duterte partikular na sa pagmugna og UNITEAM niadtong 2022 election.
Sa usa ka press conference, gisaysay ni Marcos ang daw pagmugna og UNITEAM, diin asa niadtong September 2021 dihang gihingusgan niini ang Marcos-Duterte tandem kung asa gibulgar sa Senadora nga ang orihinal nga plano mao nga si Vice President Sara Duterte ang modagan isip Presidente ug si President Ferdinand Marcos usab isip Bise Presidente.
Hugot usab nga gilimod ni Marcos ang gi-ingong nakasabotan nga 3rd Sharing luyo sa pagmugna sa UNITEAM ug hugtanong gibutyag nga puros bakak ang nahimong pamahayag ni Madriaga. Dugang pa niini, nga lahi-lahi matud pa ang lihok sa managlahing grupo niadtong panahon sa pagpangandam alang sa elections.
Aron pamatud-an ang pamahayag naghikyad kini og timeline sa mga panghitabo niadtong 2021, lakip na ang panagtapok, pagpasaka og kandidatura ug mga nahimong desisyon sa mga nag-unang personalidad. Matud pa niini, si President Marcos mipasaka og kandidatura niadtong October 6, 2021 nga walay katandem samtang nagpadayon pa ang koordinasyon sa nagkandaiyang kampo.
Dugang pa ni Senator Imee, nga ang pagdagan ni Duterte isip Bise Presidente bunga sa managlahing desisyon ug dili resulta sa bisan unsang kasabotan tali sa mga kampo. Gibutyug usab sa Senadora nga walay direktang kalabotan ang Partido Demokratiko Pilipino Lakas ng Bayan o PDP batok sa pinal nga tandem ug dili matud pa tinuod nga adunay pagtugot ang nahimong kasabotan kang kanhi President Rodrigo Duterte sa maong isyu.
