BUTUAN CITY – Mukabat sa 250 ka mga Rohingya ug mga Bangladeshis, apil na ang mga bata, ang missing human mitiklaob ang ilang gisakyang bangka sa Andaman Sea.
Sigon sa refugee and migration agencies sa United Nations, ang trawler nga mibiya gikan sa Bangladesh ug padulong unta sa Malaysia, gikatahong mitikla-ob tungod sa kusog nga hangin, dagkong balud ug overcrowding.
Sigon sa Bangladesh Coast Guard, usa sa ilang mga barko ang nakaluwas og siyam ka mga tawo ug hangtud karon, wala pa’y klaro kung pila ang sakay niini.
Nasayrang gatusan ka mga Rohingya, usa sa daghang ethnic minorities sa Myanmar, ang mikagiw patabok sa utlanan sa Bangladesh sukad nagsugod ang duguong crackdown niadtong tuig 2017.
Kini tungod kay ang Rohingya, nga mga Muslim, wala tagai og citizenship sa kagamhanan sa Myanmar, usa ka nasud diin daghan ang mga Buddhists.
Ang grabe kalisod nga pamuyo sa Bangladesh mao usa’y nakapa-aghat sa pipila ka mga Rohingya nga musugal sa delikadong paglawig sakay sa mga puno-puno nga bangka padulong ngadto sa Malaysia, usa ka Muslim country nga gilantaw sa uban nga usa ka safe haven sa rehiyon.
