BUTUAN CITY – Mi-abot na karon sa 116 ang kumpirmadong kaso sa COVID-19 sa tibuok Caraga Region human nakatala og 29 ka mga bag-ong kaso, base na sa nadawat nga resulta sa Department of Health-Caraga gikan sa Southern Philippines Medical Center sa Davao City.
Sa virtual presser, gipadayag ni DOH-Caraga regional director Jose Llacuna Jr., ang maong resulta kabahin sa 207 nga resultang gipadala kondiin 160 niini ang negatibo samtang 47 ang nagpositibo.
Sa maong ihap, 18 ang follow-up test gikan sa mga una nang nagpositibo sa maong coronavirus samtang 29 ang bag-ong mga kaso ug sa maong ihap, 16 ang mga lalaki samtang 13 usab ang mga babaye nga anaa sa age bracket nga 21 hangtud 30-anyos.
Sa 29 usab ka mga bag-ong kaso, duha niini ang natala sa lungsod sa Nasipit, Agusan del Norte; lima sa lalawigan sa Agusan del Sur nga gikan sa mga lungsod sa Bunawan, Rosario, San Francisco, Sibagat ug Trento.
Trese usab ang natala sa Surigao del Norte kondiin duha niini taga-lungsod sa Bacuag, 4 sa Claver; 1 sa Malimono; 3 sa Mainit; ug tag-usa sa Placer, San Francisco ug Tubod.
Duha usab ang natala sa Surigao del Sur kondiin tag-usa ang mga lungsod sa Cantilan ug Lingig.
Sa mga siyudad usab, 3 ang taga-Butuan City; 2 sa Surigao City samtang tag-usa sa Cabadbaran ug Bislig cities.
Ang 23 usab sa bag-ong mga kaso wala magpakita og simtomas kon mga asymptomatic apan gi-isolate na sila sa managlahing quarantine facilities sa lugar diin sila nagpuyo samtang 6 kanila ang duna’yt simtomas rason nga gi-admit na sila sa managlahing health facilities ning rehiyon.
Nasuta usab sa ilang monitoring nga 26 sa bag-ong mga kaso mga locally stranded individuals kon LSIs ug 3 ang mga Returning Overseas Filipinos kon ROFs.
