BUTUAN CITY – Nadugangan og 68 ka mga bag-ong kaso sa COVID-19 karong adlawa ang Caraga Region nga gilangkuban sa 39 ka mg lalaki ug 29 ka mga babaye samtang 67-porsiento gikan sa maong ihap, anaa sa edad nga 21 hangtud 50-anyos.
Pinakadaghang kaso ang natala sa Agusan del Norte nga mi-abot sa 20 kondiin 7 niini ang natala sa lungsod sa Buenavista, tag-4 sa Carmen ug Kitcharao, tag-2 sa Jabonga ug Nasipit ug usa sa Tubay.
Nakatala usab og 16 ka mga kaso ang Brgy. Poblacion 5 sa Cabadbaran City nga gisundan sa 15 ka mga kaso ning siyudad sa Butuan kondiin mitala og tag-3 ka kaso ang Brgy.Doongan ug Libertad, tag-2 usab ang Brgy. Limaha ug San Vicente ug tag-usa na sa Brgy. Bancasi, Basag, JP Rizal, Taguibo ug Villa Kananga.
Nagsunod ang Surigao del Sur nga duna’y 10 kansa na-apod sa mga lungsod sa Marihatag-5; Cagwait ug San Agustin tag-duha ug usa sa Barobo samtang 4 ka kaso ang natala sa Bislig City partikular sa Brgy. Mangagoy-2 ug tag-usa na sa Brgy. Labisma ug Pamaypayan ug 3 ka kaso usab sa Surigao del Norte nga na-apod sa mga lungsod sa Claver, General Luna ug Mainit.
Sa kasamtangan, ang Caraga Region duna na’y 6,806 ka cumulative COVID-19 cases apil na niini ang 896 ka mga aktibong kaso samtang 5,631 ang mga nakarekober ug 279 ang patay.
