BUTUAN CITY- Gi-aprobahan na sa 17th Sangguniang Panlungsod atol sa ikatulong Special Session kagahapong adlawa Sabado, Septyembre 5 ang SP Resolution No. 17-444-2026 nga nagdeklarar sa Butuan City ubos sa State of Calamity tungod sa grabeng pagkaputol-putol ug pagkunhod sa suplay sa tubig nga nalambigit sa nagpadayong extreme dry spell.
Base sa report sa Butuan City Water District niadtong Septiyembre 4, mokabat sa 91,425 ka mga residente sa nagkalain-laing barangay ang nakasinati og ubos nga pressure hangtod sa kawalay tubig, samtang padayon usab ang pagkunhod sa water availability.
Gikumpirma sa usab sa Department of Science and Technology-Philippine Atmospheric, Geophysical and Astronomical Services Administration kon DOST-PAGASA nga ang Agusan del Norte, lakip ang Butuan City, ubos sa “Dry Spell” status sukad Agosto 23, 2026 tungod sa dakong kakulang sa ulan.
Bisan pa sa water rationing ug uban pang lakang nga gihimo sa BCWD ug City Government, giila sa resolusyon nga dili pa igo ang mga intervention tungod sa nagpadayong krisis sa tubig.
Pinaagi sa deklarasyon sa State of Calamity, mahimong mamobilisa sa lokal nga pangagamhanan ug mga apektadong barangay ang dugang nga resources ug magamit ang ilang Quick Response Funds alang sa pagpalit ug pag-instalar sa water tanks, paggamit og water tankers, pumps, filtration systems, ug uban pang kagamitan nga gikinahanglan aron mapadayon ang episyente nga pag-apod-apod ug water rationing sa mga apektadong residente.
