BUTUAN CITY – Positibo ang usa sa mga Pinoy para-swimmers nga musalmot sa 2020 Tokyo Paralympics nga mulampos siya sa iyang kampanya.
Sumala ni Gary Bejino sa eksklusibong pakighinabi sa Bombo Radyo Butuan, motivated siyang musalmot sa olimpyada tungod kay dili matud pa tanang susama kaniyang dunay deperensya sa lawas ang nahatagan og kahigayunan nga maka-apil sa ingun niini kadako nga event.
Tungod niini nanghinam-hinam na usab siya nga muadto sa Tokyo, Japan alang sa maong dula.
Wala matud pa niya gilauman nga mu-abot ang panahong musalmot siya sa ingun niini nga dula ilabina nga kaniadto focus lang siya sa iyang pagtuon.
Samtang dakong garbo alang kang Bejino ang ilang pagsalmot sa national team sukad pa niadtong tuig 2013 tungod kay dakong tabang ang mga ganting iyang nadag-an sa mga international events ngadto sa iyang pamilya ilabina nga usa lang ka yanong construction worker ang iyang amahan samtang anaa lang sa balay ang iyang inahan.
Ang iya matud pang mga daug ilabina ang pagsakmit niya og medalya sa Asian para-games sa Singapore maoly dalan nga nakapalit sila og yuta ug nakapatukod og balay alang sa iyang pamilya.
