BUTUAN CITY – Gikumpirma sa mga eksperto gikan sa Philippine Institute of Volcanology and Seismology kon PHIVOLCS nga duna’y natigayong coastal o tectonic uplift kon pagsaka sa baybayon sa pipila ka parte sa Northern Mindanao human ang magnitude 7.8 nga linog.
Sigon ni Senior Science Research Specialist Kathleen Pampiona, na-apektuhan ang mga baybayon sa Glan, Sarangani Province apil na ang lungsod sa Jose Abad Santos sa Davao Occidental, ug Balut Islands kondiin kalit nga misaka ang yuta tungod sa paglihok sa Cotabato trench kansa usa ka aktibong fault system nga kasagari mu-unlod apan tungod sa kusog nga linog, misaka na hinuon ang pipila ka parte sa yuta ug sea ports.
Gikumpirma usab sa opisyal nga sa Brgy Camyan sa Sarangani, misaka ang ilalom sa yuta og dos metros rason nga milapad ang baybayon og hangtud 200-metros base sa ilang gihimong aerial ug ground survey.
Tungod niini, naklaro ang mga coral reefs ug mga marine organisms sama sa isda ug uban pang mga lamang-dagat nga kaniadto anaa lang ilalom sa dagat.
Ang ingon niini nga coastal uplift kasagari permanente na ug dili na mubalik sa kanhiay nga level ang yuta nga maghatag og malahutayong kabag-uhan sa porma sa baybayon ug ecosystem sa lugar.
