-- ADVERTISEMENT --

BUTUAN CITY – Opisyal nang giturn-over ni Buenavista Mayor Joselito Talan Roble, kauban si Vice Mayor Ramon Alejandro Bungabong, ang nahuman na pag-rehab ug improvement sa duha ka andana nga Buenavista Public Market nga nahimutang sa Barangay 3, Buenavista, Agusan del Norte.

Nasayrang mi-abot sa 70 milyones pesos ang kantidad sa proyekto nga gipondohan pinaagi sa loan fund gikan sa Land Bank of the Philippines.

Lakip sa mga pasilidad sa gi-ayo nga merkado ang 40 ka block tiendas sa gawas sa main building ug 117 ka stalls ug commercial spaces sa sulod, ingon man mga comfort room, storage areas, administrative office sa ikaduhang andana ug food court.

Sa iyang mensahe, gipasalig ni Vice Mayor Bungabong nga magpadayon ang administrasyon sa pagpalambo sa mga serbisyo ug pasilidad alang sa katawhan sa Buenavista.

Gipadayag usab niya nga dili na angay ikaulaw sa mga residente ang ilang merkado tungod kay usa na kini sa mga bag-ong pasilidad nga ikapasigarbo sa lungsod.

-- ADVERTISEMENT --

Nagpasalamat usab si Mayor Roble sa mga vendors tungod sa ilang pa-ilob ug kooperasyon atol sa temporaryong pagbalhin kanila samtang gihimo ang konstruksyon.

Iyang gipasalamatan ang pamilya ni late Mayor Francisco “Paking” Chan Sr. sa pagdonar sa yuta diin gitukod ang public market.

Gibutyag usab sa mayor nga naggahin sila og usa ka milyon ka pisos gikan sa Municipal Disaster Risk Reduction and Management Office o MDRRMO fund alang sa pagpalit ug pag-instalar og CCTV cameras aron mapalig-on ang seguridad sa merkado.

Gidasig usab niya ang mga vendors nga motuman sa hustong pagbayad sa buhis ug magtinabangay sa pagmintinar sa kalimpyo ug kahapsay sa bag-ong merkado.

Giklaro ni Roble nga kinahanglan sabayan ang bag-ong pasilidad og bag-ong disiplina ug panaghiusa aron mas mapalambo ang ilang lungsod.