BUTUAN CITY- Nakigtimbayayong na ang Department of Health (DOH) aron makamugna og usa ka komprehensibong PhilHealth benefit package nga nakagahin alang sa mga kababayen-an ug kabataang nakasinati og kapintasan o VAWC survivors.
Sumala ni Health Secretary Edwin Mercado, target sa ahensya nga masugdan ug mapatuman ang nasangpit nga programang panglawas sa kataposang bahin sa tuig 2027 o sa unang bahin sa 2028.
Sakop sa gidusong Z Benefit package ang padayon nga serbisyo sama sa psychosocial support ug psychological care alang sa mga biktima.
Lakip niini ang mga gikinahanglang follow-up services nga magpadayon gihapon bisan pa nga na-discharge o nakagawas na sa ospital ang pasyente.
Parte ang maong inisyatiba sa mas lapad nga health benefit roadmap sa DOH, kung asa gihatagan og-prayoridad ang mga kondisyong nakabase sa ebidensya, gastos sa pagpatamal, gidaghanon sa kaso, ug hulga sa kinabuhi.
Giklaro ni Mercado nga lahi kini nga programa ug dili sagol sa developmental disability benefit package nga gilaomang ilusad sa kataposang quarter sa 2026.












