BUTUAN CITY- Mingkunhod sa 8.9 porsyento ang headline inflation sa Caraga Region niadtong Oktubre 2026 gikan sa 9.0 porsyento niadtong Setyembre, sumala sa Philippine Statistics Authority kon PSA-13.
Bisan pa sa gamay nga pagkunhod, mas taas gihapon kini kumpara sa 1.5 porsyento nga inflation rate sa susamang bulan niadtong 2025, samtang mitala og 7.6 porsyento ang average inflation sa rehiyon gikan Enero hangtod Oktubre ning tuiga.
Sigon sa PSA-13, nakatampo sa paghinay sa inflation ang mas hinay nga pagsaka sa presyo sa pagkaon ug non-alcoholic beverages, ilabi na sa isda ug uban pang seafood, ingon man mga lugas ug produkto niini.
Sa mga probinsya, mitala sa pinakataas nga inflation rate ang Agusan del Norte nga mikabat sa 11.1 porsyento, samtang pinakubos ang Butuan City nga adunay 6.9 porsyento.
Misaka usab ang inflation sa Agusan del Sur, Surigao del Sur ug Dinagat Islands, samtang mikunhod ngadto sa 7.0 porsyento ang inflation sa Surigao del Norte gikan sa 8.3 porsyento niadtong miaging bulan.












