BUTUAN CITY – Gipasabot ni Engr Karl Jun Arellano, assistant acting head sa City Transportation, Traffic and Management Department kon CTTMD-Butuan, nga ang pagbutang og Global Positioning System kon GPS sa mga traysikol dinhi sa Butuan City, rekisitos nga nakalatid sa City Ordinance Number 7121-2024 kansa mas nailang franchise code.
Sa eksklusibong pakighinabi sa Bombo Radyo Butuan, gipadayag ni Engr Arellano nga compulsory kining sundon kalabot sa Tricycle Modernization Program diin rekisitos kini kung mu-apil og prangkisa. Pagkakuha matud pa sa prangkisa sa usa ka tricycle cooperative, hatagan sila og unom ka buwan aron pagsunod niini ug pagka-expire sa maong panahon, laing 60 ka adlaw na usab nga lugway ang ihatag kanila.
Gipasabot sa opisyal nga tumong niini nga mas mapalambo ang kaluwasan, disiplina ug pagdumala sa pampublikong transportasyon ubos sa Tricycle Modernization Program. Pinaagi sa G PS, masubay sa mga otoridad ang aktuwal nga lokasyon ug dagan sa traysikol, lakip na ang gikusgon niini ug ang pagsunod sa gitakdang ruta.
Dili lamang kini gamiton isip giya sa pagbiyahe, kondili usa usab ka himan sa pag-monitor sa mga drayber ug pagpanalipod sa mga pasahero nga mag-ilugay tungod sa kawala na’y nagdagan nga mga traysikol.
Dugang pa ni Engr Arellano, nga sa 17 ka mga kooperatiba ug usa ka korporasyon ning siyudad, duha pa lang ang naka-comply niini samtang unom ang padayon pang nagproseso alang sa pagtaud na og GPS.
Tungod sa kamahal sa galastuhan, gitugot una nila karon ang manual monitoring sa mga sakyanang magdagan sa matag-kooperatiba.












