BUTUAN CITY – Tuig 2012 pa nabantayan sa mga regional vice presidents sa Philippine Health Insurance Corporation kon PhilHealth-Mindanao ang mga anumaliya sulod mismo sa maong ahensya apil na niini ang kina-ugalingong pagtudlo og interim president nga unta bugtong ang pangulo lang sa nasud ang makahimo.
Kini wala pa’y labot sa over payment sa ahensya ilabina sa ilang ‘All Case Rate’ system nga gimugna niadto pang tuig 2013.
Kini ang gikumpirma ni Atty. Jelbert Galicto, kanhi Legal Officer sa PhilHealth-Caraga ug apil sa gipanganlan sa Senate Blue Ribbon Committee nga nalambigit sa gika-ingong mafia sulod sa ahensya.
Sa eksklusibong pakighinabi sa Bombo Radyo Butuan, gipadayag ni Atty. Galicto nga grabeng mga pagsaway ug obserbasyon ang ilang himuon kada-tuig ug sa kada-presidenteng muhulip sa ahensya pinaagi sa ilang iduso nga position papers o letters.
Dinhi matud pa nila giyagyag nga duna’y problema sa ahensya ilabina sa gimugnang ‘All Case Rate’ system human nasuta sa Commission on Audit kon COA nga duna kini 20-porsientong over payment kada-tuig hinungdan sa namugna niining financial hemorrhage.
Gihimong pananglitan sa kanhi vice president for legal affairs ang usa ka kaso sa pneumonia nga kung duna lama’y bayran nga 10-mil pesos nga bill sa ospital, 50-mil pesos gihapon ang ibayad sa PhilHealth ngadto sa ospital diin kini na-confine rason sa grabeng alkansi sa state insurer corporation.
Sigon ni Atty. Galicto, imbes nga makadaginot matud pa sa case rate nga ilang bayran kondiin niadtong tuig 2011, 30-bilyunes pesos lang ang ilang nabayran apan tungod sa ‘All Case Rate’ pag-abot sa tuig 2018, mi-quadruple na hinuon ang ilang utang nga mi-abot na sa 120-bilyunes pesos.
