BUTUAN CITY – Tun-an sa legal team sa Alliance of Concerned Teachers kon ACT partylist ang ilang buhatong lakang aron supakon ang SIM Card Registration Act human sa pagpirma ni Pangulong Ferdinand Marcos Jr kagahapong adlawa.
Sa eksklusibong pakighinabi sa Bombo Radyo Butuan, gibutyag ni Rep France Castro, nga gibantayan nila karun ang ipagawas unya nga Implementing Rules and Regulations kon IRR ilabina ang safety nets sa maong balaod.
Giyagyag usab niini ang mga rason kung nganung hugot nilang gisupak ang maong balaod.
Sumala pa ni Rep Castro, nabutang na sa risgo ang privacy sa mga matag Filipino diin obligado nang maghatag og personal data ngadto sa mga telecommunication companies.
Samtang mapihig usab matud pa niini ang mga marginalized sector o kadtong mga indibidwal nga walay valid ID nga maoy ipakita sa pagparehistro sa SIM rasong mahikaw kanila ang katungod sa kumunikasyon.
Samtang gikabalaka usab sa opisyal ang mga posible unyang pag-abuso nga mutumaw og ang paggamit niini isip surveillance ngadto sa mga kritiko sa gobyerno sama sa mga aktibista.
