BUTUAN CITY – Mikunhod sa No. 20 ang ranggo ni Filipino tennis star Alex Eala sa live WTA Finals Race kagahapong adlawa sa nagpadayon nga Madrid Open.
Gikan sa No. 17 niadtong nakalabay nga semana, nakatigum si Eala og dugang 35 puntos aron moabot sa katibuk-ang 807, sunod sa iyang round of 64 finish sa torneo.
Bisan paman niini, miangat sila Marta Kostyuk, Hailey Baptiste, ug Anastasia Potapova human makasulod sa quarterfinals.
Nakatala si Kostyuk og 930 points aron mosaka sa No. 15 gikan sa No. 22, samtang si Baptiste usab mipuwesto sa No. 17 gikan sa No. 26 sa tabang sa 843 points.
Si Potapova usab mitiurok sa No. 19 gikan sa No. 32 human matigom ang 827 points.
Nalabwan usab si Eala ni Elise Mertens, nga misaka sa No. 18 human makuha ang 830 points gikan sa iyang round of 32 finish sa Madrid, diin gipildi niya ang Filipina.
Bisan paman sa pag-overtake sa upat ka magdudula, nalikayan ni Eala ang ubos pang ranggo human miubos si Madison Keys sa No. 21 gikan sa No. 16 tungod sa kawalay puntos karun nga semana.
Laumang ipagawas ang opisyal nga Finals Race rankings lakip na ang singles ug doubles standings, human ang pagtapos sa Madrid Open sa Domingo.
