BUTUAN CITY- Gipadayag ni Oil Industry Management Bureau Director Rino Abad, nga ming-abot sa 213 ka gasoline stations nga ilang giinspeksyon gikan Nobyembre 10 hangtod 13 kung asa 114 sa mga niini nadiskubrehang wala mingtuman sa tukmang pagpaubos sa presyo sa petrolyo atol sa oil price rollback.
Personal nga gisusi sa Department of Energy, ang maong 97 ka gasoline stations ug gipasa na sa legal department ang resulta sa inspeksyon alang sa angay nga legal action batok sa mga estasyon nga nakalapas.
Gihatagan usab og 72 oras ang mga apektadong gasoline stations aron mosumite og katin-awan pinaagi sa show cause order, diin ang ilang rason mao ang nahibiling stock sa petrolyo nga napalit sa mas taas nga presyo gikan sa ilang mother companies.
Gipatin-aw usab ni Abad, nga kon ipatuman ang pagsaka sa presyo sa dihang mosaka ang kantidad sa petrolyo, kinahanglan ipatuman usab ang tukmang pagpaubos niini kon adunay price rollback.
Sigon pa ni Abad, posibleng mag-atubang og multa, pagkapriso ug pagsuspenso o pagbawi sa ilang mga permit ang mga estasyon nga mapamatud-ang nakalapas sa Oil Regulation Law ug Presidential Decree 1865.
Nahitabo kini human magpatuman pag-usab ang DOE og oil price rollback nga adunay P1.50 nga pagkunhod sa matag litro sa gasolina, P3.80 sa diesel ug P5.80 sa kerosene.












