BUTUAN CITY – Duha ang patay samtang laing 17 ka mga tawo ang angol human nahugmak ang usa ka building ngadto sa usa ka bukas nga construction site sa Brooklyn, New York City.
Tungod sa insidente, gilusad ang dakong search-and-rescue operation diin kapin sa 250 ka mga first responders ang gipakatag sa lugar aron pangitaon ang posibleng mga survivors nga natabunan sa mga nagun-ob nga bahin sa tulo-ka-andana nga building.
Pipila ka oras human sa insidente, nakuhaan og aerial video ang mga bombero samtang ilang gikuha ang usa ka survivor nga natabunan sa abog ug gibutang sa stretcher.
Gibutyag sa New York City Fire Department nga delikado kaayo ang operasyon sa pagluwas tungod sa kahimtang sa nahugno nga building ilabina nga adunay mga tawo gikan sa building ug sa kasikbit nga construction site ang natanggong sa mga nagun-ob nga materyales.
Wala pa matino sa mga otoridad ang hinungdan sa kalit nga pagkahugno sa building nga nahitabo alas 4:00 sa hapon niadtong Miyerkules, lokal nga oras.
Makita sa mga videos ang usa ka tibuok nga kilid sa building nga nahugno, diin natump-ag ang mga kwarto ug aparador.
Nagkatag usab sa palibot ang mga tipaka sa semento, nangabali nga mga metal, sinina ug uban pang gamit sa panimalay samtang nagpadayon ang operasyon sa pagpangita sa posibleng mga survivors.
