BUTUAN CITY – Gidawat na sa Senate impeachment court ang listahan sa 24 ka mga testigo sa kampo sa depensa ni Vice President Sara Duterte alang sa pagpadayon sa impeachment trial ning adlawa Lunes, Nobyembre 9.
Lakip sa mga gikatakdang mutestigo ang mga opisyal sa lokal nga kagamhanan, mga opisyal sa bangko ug mga representante sa pribadong kompanya nga gila-umang mopatin-aw kabahin sa mga propyedad, pinansyal nga transaksiyon ug tinubdan sa kita sa bise presidente.
Gawas kang Davao City Assessor Engr. Jaime Adalin, lakip sa mga gihisgutang testigo ang mga opisyal sa nagkada-iyang bangko ug si Davao City Accountant Vingelin Bajan, nga gila-umang mupresentar sa mga dokumento kalabot sa mga rekord sa kabtangan ug kompensasyon ni Duterte.
Gipahibalo usab ni Senate impeachment court Presiding Officer Francis “Chiz” Escudero ang pag-isyu og subpoena batok sa tulo ka dugang testigo, samtang gibalhin ngadto sa Nobyembre 10 ang testimonya sa usa ka corporate counsel tungod sa medical examination niini.
Gipahinumdoman usab ni Escudero ang mga senador-hukom ug mga abogado sa duha ka kampo sa pagpatuman sa sub judice rule, nga nagdili sa paghisgot sa mga detalye sa kaso ngadto sa publiko samtang nagpadayon pa ang paghusay niini.
Sa pagkakaron, ang Article II na lamang nga naghisgot sa alegasyon sa unexplained wealth o dili mapatin-aw nga kadato ang nahibilin nga husayon sa impeachment court human giatras sa prosekusyon ang laing tulo ka articles of impeachment.
