BUTUAN CITY – Giklaro ni Alger Boter – administrador sa Philippine Red Cross-Butuan City/Agusan del Norte chapter nga gimanduan na sila sa Department of Health kon DOH nga diretso na nilang ihatud sa mga ospital ang ilang matigom nga gipang-donate nga dugo.
Sa eksklusibong pakighinabi sa Bombo Radyo Butuan, gipadayag sa opisyal nga tumong niini nga mahatagan gilayon og dugo ang pasyenteng manginahanglan niini ug dili na mu-adto pa sa ilang blood bank.
Gawas pa, dili na usab mukaon og dugang oras ang kabanay sa pasyenteng manginahanglan og dugo tungod kay makuha naman unya kini direkta diha sa ospital ug dili na usab sila mangita pa og mga blood donors.
Kini matud pa nga suportado nila ang Dugong Bombo 2026 nga gibansagan niyang ‘the largest and the bloodiest blood-letting activity’ sa tibuok nasud sulod lang sa usa ka adlaw, tungod sa kadaghan sa mga gustong mag-donate sa ilang dugo aron matabangan ang mga manginahanglan niini.
Aminado si Boter nga base sa ilang rekord, anaa sa lima hangtud napulo ka mga indibidwal lamang kada- adlaw ang boluntaryong mag-donate og dugo sa ilang buhatan samtang mu-abot usab sa 35 hangtud 40 ka mga blood bags kada-adlaw ang ilang ma-dispense rason nga suportado nila ang Dugong Bombo 2026 nga himuon karong Nobyembre 14 sa Event Center, 3rd floor sa SM City Butuan ning siyudad dayong panawagan sa tanan nga dili palabyon ang higayon nga maka-donate sila sa ilang dugo.
