BUTUAN CITY- Gisalikway ni US President Donald Trump ang sugyot sa Iran alang sa pito ka adlaw nga ceasefire o hunong-buto ug gipahibalo sa iyang mga opisyal nga gilauman niininf ipadayon sa Estados Unidos ang pagpamomba batok sa Iran human sa midterm elections sa Nobyembre.
Sigon sa mga opisyal sa Estados Unidos, nagpabiling nagduhaduha si Trump kung tumanon ba sa Tehran ang mga kondisyon nga gipangayo sa Amerika bisan pa sa nagpadayong negosasyon pinaagi sa mga regional mediator.
Ubos sa sugyot sa Iran, gihangyo niini ang Estados Unidos nga tangtangon ang naval blockade, buhian ang pipila sa mga frozen o gipugngan nga assets niini, ug pagaanon ang mga sanksyon sa pagbaligya sa lana isip kabaylo sa pag-abli pag-usab sa kritikal nga Strait of Hormuz ug pagpadayon sa nuclear negotiations.
Apan pormal nang gipahibalo sa Estados Unidos ngadto sa Iran ug sa mga tigpataliwala nga wala kini’y plano nga tangtangon ang kasamtangang maritime blockade sa mga pantalan sa maong nasud.
Bisan pa niini, wala pa matino ang eksaktong sakop sa posibleng sunod nga mga pag-atake militar sa Amerika, samtang giingon sa mga opisyal nga mahimo gihapon mausab ang posisyon ni Trump samtang nagpadayon ang mga negosasyon.
