BUTUAN CITY- Gibanabana nga kapin 2.7 bilyon ka tawo, lakip ang mga bata, ang naladlad sa second-hand smoke sa tibuok kalibotan nga nalambigit sa mokabat sa 1.66 milyon ka premature deaths, sumala sa usa ka pagtuon nga gipatik sa The Lancet.
Sa maong ihap, kapin 767 milyon ka mga batang nag edad og zero hangtod 14 anyos, samtang ang exposure sa second-hand smoke gibanabana usab nga hinungdan sa 5.2 milyon ka respiratory tract infections sa mga bata sa maong tuig.
Sigon sa mga researcher, walay luwas nga lebel sa pagsinghot sa second-hand smoke, nga adunay mga makahilo ug cancer-causing chemicals gikan sa aso sa nagdilaab nga tabako ug sa aso nga gipagawas sa nanigarilyo.
Bisan pa sa pagkunhod sa smoking rate sa tibuok kalibotan sukad 1990, nagpabiling taas ang aktuwal nga ihap sa mga naladlad tungod sa pagdaghan sa populasyon ug pagtaas sa exposure sa pipila ka rehiyon sama sa Africa ug Middle East.
Mas apektado usab ang mga kababayen-an, ilabi na sa mga lugar diin gamay ang porsyento sa mga babayeng nanigarilyo, hinungdan nga nanawagan ang mga researcher og mas hugot nga tobacco control sa mga pampublikong lugar ug sulod mismo sa mga panimalay aron mapanalipdan ilabina ang kababayen-an ug mga bata.
