BUTUAN CITY- Gipahimangnoan sa National Kidney and Transplant Institute kon NKTI ang publiko batok sa mingkaylap nga social media trend diin nagpakita og mga kataw-anan nga post ug AI-generated nga mga hulagway bahin sa pagbaligya o pagbaylo sa kidney alang sa mga gadget.
Sumala sa NKTI, bisan pa og binuang lamang ang maong mga post ug dili tuyo nga mag-awhag sa ilegal nga buhat, kinahanglan nga dili himuong commodity o porma sa bayad ang mga organo sa tawo.
Gipasidaan usab sa institusyon nga mahimong masabtan kini sa sayop nga paagi, ilabina sa mga batan-on ug mga tawo nga mas dali maimpluwensyahan, ug mahimong makakaplag og sayop nga impormasyon nga daw legal ang pagbaligya sa organo.
Sigon pa sa NKTI, mahimo usab niini maminusan ang kaseryoso sa kahimtang sa mga buhing donor, transplant recipients ug mga pasyenteng naghulat og organ transplant, gani giawhag niini ang publiko nga mahimong mas responsable ug sensitibo sa ilang mga post online ug gamiton ang digital platforms sa pagpaambit og tukmang impormasyon ug pagrespeto sa dignidad sa mga nalambigit sa organ donation.
Gi-emphasize usab sa NKTI nga ang organ donation usa ka gasa sa kinabuhi ug dili paagi sa pagbayad.
