BUTUAN CITY- Giklaro sa Philippine National Police (PNP) nga wala silay nadawat nga unsa mang impormasyon nga adunay hulga sa kinabuhi batok kang Vice President Sara Duterte.
Sumala ni PNP chief General Jose Melencio Nartatez Jr, nga gibantayan nila ang sitwasyon human gihisgutan sa Bise Presidente nga nahadlok kini sa iyang kinabuhi ug ang kinabuhi sa iyang pamilya.
Dugang pa sa PNP chief, wala silay rekord nga nagparehistro ang Bise Presidente sa bisan unsang estasyon sa pulis bahin sa giingong hulga sa iyang kinabuhi.
Wala usab matud pay namonitor ang PNP og unsa mang lehitimong pagpanghadlok nga posibleng moresulta sa risgo sa kinabuhi sa Bise Presidente ingon man sa pamilya niini.
Gisiguro usab ni Nartatez nga bukas sila sa pagdawat og bisan unsang report sa mga hulga, pinaagi man kini sa mga dokumento o mga pahayag, aron ilang imbestigahan.
Girespito usab sa PNP ang katungod sa kinsa man ang nagpadayag sa ilang kaluwasan ug ang pagtrato sa mga niini apan importante usab nga adunay hustong beripikasyon alang sa hustong impormasyon.
Gani, aduna nay mingtabang nga mga kapulisan kang Duterte niadtong mipasaka kini sa Quezon City Regional Trial Court kagahapon Sabado tungod sa three counts of grave threats ug luwas nga naka-abot ang Bise Presidente sa korte.
Kahinumdumang nagduha-duha ang Bise Presidente pagsulod sa QC RTC ug nagpa-uban sa mga kapulisan tungod sa hulga sa kinabuhi niini.
Girekord niini ang tanang hulga ug pagpanghasi nga gihimo batok kaniya sukad tulo ka tuig na ang milabay.
Ang kaso naggikan sa pamahayag sa Bise Presidente sa usa ka online press conference niadtong 2024 diin iyang gimando ang pagpatay kang President Ferdinand Marcos Jr., First Lady Liza Marcos ug kanhi Speaker Martin Romualdez ugaling kini patyon.
