BUTUAN CITY- Gikatakdang magpadala ang Police Regional Office 13 o PRO-13 og 866 ka police personnel gikan sa nagkadaiyang unit ug provincial offices sa Caraga Region ngadto sa Bangsamoro Autonomous Region in Muslim Mindanao o BARMM aron motabang sa seguridad sa umalabot nga unang parliamentary election sa rehiyon.
Sumala ni PLCol. Jennifer Ometer, Chief Regional Public Information Officer sa PRO-13, gikan sa unang 766 ka personnel nga gikinahanglan, nadugangan pa kini og 100 ka personahe nga gilangkuban sa 60 ka lalaki ug 40 ka babaye. Sigon pa niini, nga ang maong mga pulis ipadala isip Special Electoral Boards ug motabang usab sa pagbantay sa mga election logistics.
Gibutyag usab ni Ometer, nga gipang-andam ug gipailalom na sa training ang mga kwalipikadong personnel, ilabi na kadtong angay pa sa maong buluhaton.
Ang deployment kabahin sa national augmentation sa Philippine National Police, diin nagpadala usab og personnel ang ubang police regions ngadto sa BARMM alang sa seguridad ug hapsay nga pagdumala sa unang parliamentary election sa rehiyon.
