BUTUAN CITY – Mi-ubos ang world ranking sa Gilas Pilipinas human sa third window sa Basketball World Cup Qualifiers ning buwan sa Hulyo.
Base sa FIBA Men Ranking, anaa na sila sa ika-39 nga puwesto, gikan sa ika-36.
Ang maong ranking gipagawas human sa duha ka kapildihan sa Gilas — usa ka double overtime loss batok sa New Zealand 106-102 ug batok sa Australia 92-49 ning mi-aging mga semana. Sa Asian zone, anaa sa ika-pito nga puwesto ang Gilas Pilipinas diin ang Australia ang nag-una.
Dili lang ang Gilas ang nakasinati og pagkahagba sa ranggo kondili apil na ang Australia nga kaniadto ika-pito sa tibuok kalibutan,apan anaa na karon sa ikawalo. Samtang ang Kuwait gikan sa ika-109, nahulog na sa ika-118, ug ang South Africa gikan sa ika-110, nahulog sa ika-119.
Gila-umang ma-usab pa ang ranking sa Gilas Pilipinas sa ilang umaabot nga mga duwa batok sa Jordan sa Agosto 28 ug batuk Iran sa Agosto 30.
