BUTUAN CITY – Sulod lang sa ikaduha ka adlaw isip regional director sa Department of Education kon DepEd-Caraga, gipadayon ni Dr Allan Farnazo ang iyang immersion school visits dinhi sa dakbayan sa Butuan.
Determinado nga mudumala gikan sa ground inay nga gikan lang sa iyang lamisa, laing adlaw na usab ang gitagana ni Director Farnazo sa pakigkita sa mga school heads, mga magtutudlo, mga learners, ug mga komunidad aron makita nga personal ang mga hagit ug kalampusan sa paghulma sa edukasyon ning rehiyon.
Apil sa iyang gibisita ang West City Central Elementary School, nga maoy pinakaduol sa DepEd Caraga Regional Office kondiin nakigmimamat siya kang School Head Marylou Rocososa ug gisusi ang kahimtang sa 1,053 ka mga learners ug 46 ka mga magtutudlo.
Mibisita usab siya sa Butuan City School of Arts and Trades (BCSAT), apil sa Bancasi Integrated School kondiin iyang gi-obserbahan ang implementasyon sa campus security protocols ug nakigsulti sa mga magtutungha.
Sigon ni DepEd-Caraga spokesperson Pedro Tecson, nakita nila ang lahi nga liderato ni Dr Farnazo tungod kay makita dayon siya sa field ug gipakita usab niini ang iyang pagka-approachable.
