BUTUAN CITY- Gidayeg ni Chinese President Xi Jinping atol sa iyang unang opisyal nga pagbisita sa gawas sa nasod karong tuiga, ang gitawag niining “invincible friendship o dili mapildi nga panaghigalaay” tali sa China ug North Korea human kining ming-abot sa Pyongyang, diin siya personal nga giabiabi sa lider nga si Kim Jong Un ug sa asawa niini nga si Ri Sol-ju.
Ang pagbisita ni Xi nahitabo samtang nagpabiling wala’y kalamboan ang negosasyon sa nuclear program sa North Korea ug sa Estados Unidos. Sumala sa mga eksperto, mas gipasiugda karon sa Beijing ang kalig-on sa Pyongyang regime kaysa pagpugos niini sa denuclearization, tungod nakita sa China ang North Korea isip importante nga kaalyado ug buffer state batok sa impluwensiya sa US ug sa mga kauban niini sa rehiyon.
Sa usa ka artikulo nga gipatik sa Rodong Sinmun, misaad si Xi sa mas hugot nga kooperasyon ug giingong magpabiling lig-on ang tradisyonal nga panaghigalaay sa duha ka nasod bisan pa sa nag-usab-usab nga kahimtang sa kalibotan.
Samtang nagkadako usab ang impluwensiya sa Russia sa North Korea tungod sa gubat sa Ukraine, gituohan sa mga analista nga ang pagbisita ni Xi usa ka lakang aron mapalig-on pa ang impluwensiya sa China sa Pyongyang ug mapadayon ang estratehikong panag-alyansa sa rehiyon.
