BUTUAN CITY – Nangabuak ang parte sa Pier Site sa Sitio Balete, Barangay Alimsog sa lungsod sa Sto. Domingo, Albay human ang natalang magnitude 5.3 nga linog niadtong Hunyo 5, 2026, bandang alas-9:57 sa gabi-i.
Sumala sa Philippine Institute of Volcanology and Seismology (PHIVOLCS), ang linog dunay kalawmon nga 9 kilometros ug gitumbok ang lokasyong kapin 15 kilometros amihanang sidlakan sa Sto. Domingo, Albay.
Natala ang Intensity V sa Sto. Domingo ug siyudad sa Legazpi, samtang Intensity IV usab sa Tabaco City, Ligao City, Malilipot, Albay, ug pipila ka lungsod sa Sorsogon sama sa Cogon, Irosin, ug Donsol. Nabati usab ang Intensity III sa Naga City, Malinao, Albay, ug sa Sorsogon City, Prieto Diaz, ug Juban. Sa Goa, Camarines Sur ug Bulan, Sorsogon natala ang Intensity II.
Sa instrumental intensities, migawas ang Intensity VI sa Tabaco, Albay; Intensity V sa Castilla, Sorsogon; Intensity IV sa Sorsogon City ug Iriga City, Camarines Sur; Intensity III sa Prieto Diaz, Sorsogon; Monreal, Masbate; Sagnay, Sipocot, Pili, ug Mercedes, Camarines Sur; ug Intensity II sa Pasacao ug Ragay, Camarines Sur; Milagros, Masbate; San Roque ug Gandara, Northern Samar.
Sa kasamtangan nagpaadayon ang assessment sa mga hingtungdan aron matumbok ang kalapad sa damyos ilabina sa Pier Site nga nakita ang mga buak human ang pagtay-og.
Walay gitaho usab nga namatay o nasamdan apan padayon nga gitambagan ang mga residente nga mahimong alerto sa posibleng aftershocks ug epekto sa linog sa mga dakbalay ug imprastruktura.
