BUTUAN CITY – Nadiskubrihan ang usa ka parasite nga mokaon og preskong unod ug nagpuyo pinaagi sa pagpangaon sa mga hayop nga adunay init nga dugo sa Estadus Unidos sa unang higayon sukad niadtong 1966.
Ang New World Screwworm kon NWS nagpadayon sa pagkatag sa tibuok Mexico sulod sa milabay nga tuig ug karon nakit-an na sa usa ka nati nga baka sa Texas, sumala sa US Department of Agriculture kon USDA niadtong Miyerkules sa gabii.
Nagpadayon na ang mga paningkamot aron mapugngan ang pagsulod sa screwworm ngadto sa US sukad nagsugod ang pagdaghan sa mga kaso sa Central America ug Mexico.
Ang kaso gikumpirma sa lungsod saLa Pryor, Texas, mga 30 milya (48 km) gikan sa habagatang utlanan tali sa US ug Mexico. Nabalaka ang mga mag-uuma ug tag-iya sa mga baka sa US nga ang posibleng outbreak mahimong makapagamay sa ilang kahayupan, makapakunhod sa produksyon sa karne sa baka, ug makapataas sa presyo alang sa mga konsumidor.
Ang screwworm usa ka klase sa langaw nga parasito diin ang babayeng langaw mangitlog sa mga abli nga samad ug sa basa nga bahin sa lawas sa mga hayop. Kon mapusa ang mga itlog, gatusan ka ulod ang mosulod ug mokutkot sa buhing unod gamit ang ilang hait nga baba, ug mahimong makapatay sa hayop kung dili matambalan.
Ang New World Screwworm makatakod usab sa mga tawo ug binuhi nga hayop, apan ubos ra ang risgo alang sa mga tawo ug talagsaon ra kaayo ang mga kaso sa tawo nga matakdan. Wala usab kini’y hulga sa kaluwasan sa pagkaon.
Tungod niini, ang US Department of Agriculture ug mga awtoridad sa Texas nagtukod ug 20 km (12.4 milya) nga detection and quarantine zone .
Nagplano usab sila sa pagpagawas ug minilyon ka sterile (dili makapaanak) nga screwworm flies. Tungod kay ang babayeng screwworm makigpares lamang kausa sa tibuok niyang kinabuhi, ang mga itlog nga iyang mapangitlogan human makigpares sa sterile nga laki dili ma-fertilize ug dili mapusa.
