BUTUAN CITY – Usa ka resolusyon karun ang giduso sa Senado nga nag-aghat kang Senador Ronald “Bato” dela Rosa nga boluntaryong musurender na sa mga awtoridad ug moagi sa tukmang proseso sa balaod mahitungod sa warrant of arrest nga gipagawas batuk kaniya sa International Criminal Court (ICC).
Ang Senate Resolution No. 395 gisang-at nila Senador Francis “Kiko” Pangilinan, Vicente “Tito” Sotto III, Panfilo Lacson, Risa Hontiveros, ug Bam Aquino samtang nagpabiling anaa sa Senado si dela Rosa sa ilalom sa protective custody.
Niadtong Lunes, gibutang si dela Rosa sa protective custody sa Senado sa ilalom sa bag-ong liderato ni Senate President Alan Peter Cayetano.
Sa resolusyon, gibutyag sa mga senador nga bisan og dunay kagahum og pribilehiyo ang Senado ilalom sa Konstitusyon, dili niini tugutan ang Senado nga magsilbing sanctuary o maghatag og immunity gikan sa pag-aresto sa bisan kinsang miyembro niini.
Gipasabot usab nga ang bugtong immunity nga ihatag sa Konstitusyon sa mga senador limitado lang sa mga kasong dunay silot nga dili moubos sa kapin unom ka tuig nga pagkapriso samtang anaa sa sesyon ang Kongreso.
Dugang pa sa mga niini, walay probisyon sa Konstitusyon o sa Senate Rules nga naghatag og kagahum sa Senado aron maghatag og “protective custody,” institutional refuge, o immunity batuk sa lawful arrest o surrender process.
Gitumbok usab sa mga senador nga sa mga nakalabay nga kaso nga gilambigitan sa mga kanhe senador sama nila Juan Ponce Enrile, Leila de Lima, ug Antonio Trillanes IV, girespeto sa Senado ang judicial process.
Tumong sa resolusyon nga ipahinumdum nga walay constitutional o statutory authority ang Senado aron maghatag og proteksyon batuk sa lawful arrest o judicial proceedings.
