BUTUAN CITY – Gipasabot ni Congressman Romeo S. Momo Sr., Surigao Del Sur-1st District Representative, ang iyang pagbotar og YES sa articles of impeachment batuk kang Vice President Sara Duterte kagahapong adlawa.
Sigon ni Cong Momo nga bisan sakit huna-hunaon ang pagbotar nga pabor tungod kay taga Mindanao usab siya, kinahanglan matud pa niyang barugan ang iyang papel isip prosecutor sa impeachment.
Sumala pa niini, nga duna siya’y abogado nga magsilbing consultant og didto nakita nga dunay sufficiency in forms and substance ang impeachment complaint rasong mibotar siya niini aron mapadala sa senado nga magsilbing korte.
Manubag man usab siya sa katawhan ugaling dili siya mobotar og YES bisan og tataw kaayu ang duha ka main ingredients aron kini mo-aginod.
Gane, wala siya naglaum nga muabot sa boto nga 255 ang mopabor nga mas daghan pa sa unang pagpa-impeach nila sa besi presidente.
Giklaro usab ni Momo nga ang pagpasa sa articles of impeachment ngadto sa senado, paghatag og higayon kang Vice President Sara Duterte nga madepensahan ang iyang kaugalingon batuk sa mga akusasyon.
Gitin-aw usab ni Congressman Momo nga wala sila makadawat og pressure gikan sa kampo ni Vice President Sara Duterte o sa bisan asang panig atol sa ilang pagbotar.
Apan nasayud matud pa siya nga dunay risgo sa iyang pagpaabot sa impeachment ilabina sa baruganan usab sa iyang mga konstituwente.
Nagtrabaho lang matud pa siya isip prosecutor og ang anaa sa iyang huna-huna mao ang paghatag og higayon sa besi presidente nga madepensahan ang iyang kaugalingon.
Sunod nga tutukan karun sa House Of Representatives ang pagpili sa mga prosecutors nga magrepresenta sa kamara ngadto sa senado atol sa pagtaral.
