BUTUAN CITY – Subling gipadayag sa 11 ka lider sa Association of Southeast Asian Nations kon ASEAN ang ilang komitment sa pagpalig-on sa kooperasyon sa panglawas sa rehiyon ug sa pagtukod og mas lig-on nga public health systems taliwala sa nagkadaghang hulga sa sakit ug pandemya sa tibuok Southeast Asia.
Sumala sa pamahayag sa Chairman sa 48th ASEAN Summit sa Cebu, gitumbok sa mga lider ang importansya sa pagsiguro nga ang tanan adunay access sa importanteng health services ug sa paspas nga paggamit sa digital health systems sa rehiyon.
Dugang pa niini ang pagpabilin nga komitado ang ASEAN sa “pagtukod og mas himsog, mas lig-on, mas inklusibo, ug mas malungtarong ASEAN Community” pinaagi sa mas lig-on nga koordinasyon sa healthcare ug pagtubag sa mga sakit.
Gihatagtan og importansiya pa sa mga lider ang panginahanglan sa pagsulbad sa child malnutrition ug pagpaayo sa immunization efforts, samtang gipalig-on ang pagpangandam ug pagtubag sa rehiyon batok sa outbreaks, pandemics, ug uban pang molutaw nga hagit sa panglawas.
Giila pa sa mga lider nga delikado ug dali maapektuhan ang rehiyon sa mga hulga sa panglawas sama sa pandemics, disease outbreaks, ug natural disasters.
Kini ang rason nga paningkamotan ang pagpalambo sa prevention, preparedness, detection, ug response systems alang sa umaabot nga health emergencies.
Gidawat usab niini ang plano sa pagtukod sa ASEAN Centre for Public Health Emergencies and Emerging Diseases, nga magsilbing sentro sa rehiyon alang sa surveillance, research, training, ug information exchange.
Tumong niini nga mapalig-on ang pagpangandam ug kapasidad sa rehiyon sa pagtubag panahon sa umaabot nga public health crises.
Girekognisa usab ang papel sa artificial intelligence (AI) sa healthcare delivery og public health management.
