BUTUAN CITY – Nadiskubrihan sa gihimong pagtoon nga ang 4-mil ka tuig na nga tambal, nga kasagaran gigamit sa pagtambal sa kasakit, makapugong sa pipila ka mga tumor nga maporma og mokuyanap sa tibook lawas.
Si Nick James, usa ka British nga furniture maker, unang nabalaka sa iyang panglawas human namatay ang iyang inahan tungod sa kanser ug pagkahuman, ang iyang igsoon ug pipila pa ka mga miyembro sa pamilya nakasinati og bowel cancer.
Nagdesisyon kini nga magpa-genetic testing, ug nadiskubrehan nga siya adunay dili maayong gene nga nagresulta sa Lynch Syndrome, usa ka kondisyon nga dako kaayo ang posibilidad nga makaangkon sa maong klase sa kanser.
Si James nahimong unang tawo nga ni-sign up sa usa ka clinical trial aron sulayan kung ang adlaw-adlaw nga dosis sa aspirin – ang over-the-counter nga tambal sa kasakit – makapugong sa pagdako sa kanser.
Depende sa klase sa gene mutation, 10-80% sa mga tawo nga adunay Lynch Syndrome makasinati og bowel cancer sa ilang kinabuhi.
Apan hangtod karon, maayong balita para ni James tungod kay sulod sa napulo ka tuig nga naggamit siya og aspirin, wala pa siyay kanser. Kini ang gikumpirma ni John Burn, usa ka propesor sa clinical genetics sa Newcastle University, nga nagdumala sa trial.
Bisan lisod tuohan, apan dugay na ang indikasyon nga ang tambal makatabang sa pagpakunhod sa posibilidad nga mahimong colorectal cancer.
Sa miaging tuig, daghang trials ug pagtuon ang nagpalig-on sa maong ebidensya.
Ang pipila ka nasud nag-usab na sa ilang medikal nga giya aron iapil ang tambal isip unang depensa para sa mga pinaka-risky nga tawo apan kinahanglan ang giya sa usa ka doktor.
