BUTUAN CITY – Laumang motaas og 30% ang presyo sa condom tungod sa epekto sa tensyon tali sa Iran ug United States.
Sumala sa Karex, posible matud pang motaas pa ang presyo kung magpadayon ang problema sa suplay ug ekonomiya.
Ang Karex usa sa pinakadakong naghimo og condom sa kalibutan ug supplier sa pipila ka brand.
Sigon sa kumpanya nga ang kagubot sa pangkalibutanong suplay sa lana ilabina sa Strait of Hormuz, nakaapekto sa gastos sa produksyon. Tungod niini, mitaas usab ang presyo sa mga hilaw nga materyales nga gigamit sa paghimo og condom sama sa kemikal nga gikan sa lana.
Pagbutyag sa CEO sa Karex nga si Goh Miah Kiat, dako ang epekto sa mas mahal nga transportasyon ug pagkalangay sa shipping sa tibook kalibutan rasong motaas usab ang presyo sa produkto.
Nagpasidaan usab ang mga eksperto sa pampublikong panglawas nga mamahimong mosaka ang kaso sa dili luwas nga pakighilawas, sexually transmitted infections (STIs), ug dili planadong pagmabdos kung mahimong mas mahal ug lisud nga makakuha og condom.
