BUTUAN CITY – Gihikling na sa lokal nga panggamhanan sa lungsod sa Hinatuan, Surigao del Sur ang mga residente nga nagpuyo duol sa baybayon ug kadtong anaa sa mga flood ug landslide-prone areas human gipa-ilalom sa storm signal number 2 ang maong lalawigan tungod sa bagyong Basyang.
Partikular nga gipahikling ang mga residente sa Mahaba Islands, sa Barangay San Juan tungod sa nagkadako nga balod sa baybayon ug sa padayon nga pagkusog sa huros sa hangin.
Alerto na usab ang Office of the Civil Defense–Caraga, aron 24/7 nga mamonitor ang posibleng mga emerhensiya nga mahimong mahatud sa maong bagyo nga karon naka-apekto sa pipila ka mga lungsod sa Caraga Region.
Gihimo kini ilabina kay nagpagawas na og storm surge warning ang weather bureau alang sa mga baybayon sa rehiyon, hinungdan nga gipatuman ang evacuation order.
Suspendido na usab ang klase karong adlawa sa mga tunghaan sa mga apektadong lalawigan apil na sa Agusan del Norte.
