BUTUAN CITY – Ni-abot sa 13 ka sako sa basura ang nakita ni Cherrlyn Goloran, Purok 5 President sa Barangay Mahogany ning siyudad sa Butuan nga gipang labog kansa adunay sulod nga hazardous materials ug gipang-ulod na ang uban nga posibleng makadaot sa panglawas sa katawhan.
Sa eksklusibong pakighinabi sa Bombo Radyo Butuan, gisaysay ni Goloran nga ang mga nakitang sako naggikan lang matud pa sa usa ka indibidwal nga nagpuyo sa Brgy. Villakananga ning siyudad, base sa mga parcel nga sulod sa maong mga basura.
Gipadayag niining sakit sa iyang buot ug insulto matud pa kanila nga bisan aduna nay signage nga nagdili sa paglabog og mga basura sa maong dapit apan padayon gihapon kini nga gilapas rason nga plano nila nga tiketan ang maong indibidwal isip silot.
Gani ilang imbestigahan karong Lunes atol sa ilang meeting ang panghitabo aron masuta ang tibuok sitwasyon ug mapa-ilalom kini sa due process.
Dugang pa ni Goloran, mismong ang barangay ang matiketan sa city government kung mapamatud-an nga wala natuman ang obligasyon sa pagmentina sa kahinlo sa palibot. Luoy matud pa ang council, kay sila ang mag-amot-amot sa pagbayad sa basura nga dili gikan sa ilang tagi-barangay.
