BUTUAN CITY- Gisiguro nga i-rebisa sa Kamara ang ilang Rules on Impeachment.
Sumala ni Rep. Joel Chua, miembro sa House Prosecution Team, nga siguradong irebyu sa Kamara ang pipila ka Rules on Impeachment human sa pinal nga desisyon sa Korte Suprema kansa nagdeklarar nga unconstitutional ang impeachment batok kang Vise Presidente Sara Duterte.
Sigon ni Chua, makigkita matud pa kini sa iyang mga kauban sa Kamara aron hisgutan ang labing angay nga pamaagi sa pag-usab sa palisiya, lakip na ang pagpaminaw sa input sa mga mipasaka sa impeachment complaint nga karon mga miembro na usab sa House. Posible usab nga adunay kausaban sa komposisyon sa Prosecution Team.
Samtang si Rep. Jonathan Keith “Atty. John” Flores misulti nga adunay puwang gihapon ang Kamara sa pagsunod sa desisyon sa Korte Suprema samtang ginapadayon ang co-equal authority sa House sa impeachment matters.
Gipunting ni Flores nga ang bag-ong patakaran kinahanglan nga mahinlo ug maingat nga nakabalangkas aron masiguro ang hustong proseso nga giila sa Korte Suprema. Dugang pa, susihon sa Kamara ang tibuok desisyon ug ang mga hiwalay nga opinyon sa mga mahistrado aron masiguro ang tukmang statutory construction sa dili pa ipatuman ang rebisyon.
Giklaro ni Flores nga andam ang Kamara sa maong lakang ug gisaad nga ang rebisyon sa Rules on Impeachment magpabilin nga balanse—mosunod sa Korte Suprema samtang ginapadayon ang gahum sa Kongreso sa pagpatuman sa constitutional prerogatives niini sa impeachment.
