BUTUAN CITY – Nibisita karong adlawa si Senador Rodante Marcoleta sa Veruela, Agusan del Sur aron inspeksyunon ang mga pasilidad sa irrigasyon ug personal nga tan-awon ang aktuwal nga kahimtang sa sistema sa tubig human sa reklamo nga gipadala sa iyang opisina.
Kauban niini si National Irrigation Administration kon NIA administrator Eddie Guillen sa pag-assess sa mga apektadong lugar, diin gi-inspeksyon nila ang irrigation canal nga gitukod niadtong tuig 2012 ug ang pumping station nga gitukod niadtong 2016 nga dili na magamit tungod sa siltation.
Gipadayag sa senador ang importansya sa tubig ug irigasyon isip kinabuhi sa agrikultura ug pagkaon.
Gipadayag niini nga kung dili lang tungod sa daghang nasyonal nga isyu nga gi-atubang sa Senado, mas dali unta matubag ang rehabilitasyon sa irigasyon.
Samtang gipadayag usab ni Guillen nga adunay plano nga imontar ang Sabot dam nga gamitan og solar-powered system isip mas sustainable nga alternatibo kaysa diesel-powered nga makina.
Sa pagtapos sa iyang pagbisita, mapasalamaton si Marcoleta sa suporta sa katawhan sa Agusan del Sur ug sa Mindanao sa mi-aging eleksyon.
