BUTUAN CITY – Gikumpirma sa Food and Drug Administration (FDA) nga nakadawat sila og 25 ka report kabahin sa boluntaryong pag-recall sa pipila ka batch sa Nan Optipro ug Nankid Optipro nga gatas alang sa mga puya.
Sa maong ihap, 18 niini duna’y kalabutan sa mga isyu sa panglawas nga nasinati sa mga bata human mi-inom sa apektadong produkto sama sa pagsuka-suka, diarrhea, ug kasakit sa tiyan, ug adunay pipila ka kaso nga nanginahanglan og tambal sa ospital.
Tungod niini, gisiguro sa FDA nga padayon nilang gitan-aw ang tanang reports ug nakig-alayon sa mga hingtungdang ahensya, ingon man sa Nestlé Philippines, Inc., aron masiguro nga husto ang pagpatuman sa pag-recall sa maong mga produkto.
Gipasidan-an usab ang mga ginikanan ug caregivers nga bantayan pag-ayo ang panglawas sa ilang mga anak ug dali nga magpakonsulta sa doktor kung makasinati og simtomas.
