BUTUAN CITY – Nagpagawas og warrant of arrest ang korte sa Batangas batok sa negosyanteng si Charlie “Atong” Ang may kalabotan sa pagkawala sa mga sabungero.
Gikumpirma mismo ni Prosecutor General Richard Anthony Fadullon nga ang Lipa City, Batangas Regional Trial Court, nag-issue og arrest warrant kang Ang ug sa 20 pa kauban niyang akusado. May kalabotan kini sa kaso nga unom ka ihap sa kasong kidnapping with homicide nga walay piyansa.
Tungod niini, gmanduan sa korte ang mga otoridad nga isilbi ang warrant ug dakpon si Atong Ang aron dalhon sa kustodiya sa husgado.
Gimanduan usab sa korte nga ang mga arresting officer maggamit og body-worn camera ug laing recording devices sa pagpatuman sa warrant.
Dugang pa, mas sayo nga nagpagawas og laing arrest warrant ang Sta. Cruz, Laguna Regional Trial Court Branch 26 alang sa laing kaso batok kang Atong Ang.
Sumala sa Department of Justice, kini naglakip sa 16 ka ihap sa kasong kidnapping with serious illegal detention ug napilo ka ihap sa kidnapping with homicide nga may kalabotan gihapon sa pagkawala sa mga sabungero.
