BUTUAN CITY – Mas mikusog pa ang tropical depression Ada ug nahimong tropical storm kansang sentro nasigpatay sa distansyang 400-kilometros sa sidlakang bahin sa Surigao City, Surigao del Norte, dala ang kusog nga hanging mu-abot sa 65 km/h duol sa sentro, ug buylo nga mu-abot sa 80 km/h ug naglihok pa-amihanang kasadpan sa kusog nga 15 km/h..
Ang kusog nga hangin sa bagyo mu-abot hangtod 400 kilometro gikan sa sentro, nga nagdala og kusog hangtod sa gale-force nga mga hangin.
Tungod niini, gipatuman ang Tropical Cyclone Wind Signal (TCWS) No. 1 sa pipila ka bahin sa Luzon, Visayas, ug Mindanao ilabina sa sidlakang bahin sa Camarines Sur, Sorsogon, sidlakang bahin sa Albay (lakip ang Legazpi City ug Tabaco City), ug Catanduanes alang sa Luzon.
Samtang sca Visayas, anaa ang Northern Samar, Samar, Eastern Samar, sidlakang bahin sa Biliran, sidlakang bahin sa Leyte (lakip ang Tacloban City), ug sidlakang bahin sa Southern Leyte ug dinhi sa Mindanao, ang Dinagat Islands, Surigao del Norte, ug Surigao del Sur.
