BUTUAN CITY – Misaka na sa 63 ang natalang mga kaso sa “Super Flu” sa nasud base sa pinakabag-ong datos sa Department of Health (DOH). Sumala ni Health Spokesperson Albert Domingo, ang maong datos natala niadtong Disyembre, ug iyang gipasabot nga ang super flu usa lamang ka variant sa influenza A o trangkaso, ug dili bag-ong sakit.
Gipasabot pa ni Domingo nga ang mga simtomas sa super flu walay kalainan sa kasagarang simtomas sa trangkaso sama sa ubo, sip-on, hilanat, ug kasakit sa lawas.
Gipasabot usab sa opisyal nga kasagaran gayud mosaka ang mga kaso sa respiratory infections tungod sa kausaban sa panahon.
Giklaro usab ni Domingo nga tungod kay Enero pa karon, dako gihapon ang posibilidad sa pagbag-o sa panahon, busa posible usab nga makasinati ang publiko og iritasyon sa ilong ug tutunlan.
Samtang gidasig sa DOH ang publiko nga magsul-ob og face mask isip proteksyon ug pag-amping sa ingon ani nga mga sitwasyon, dayong klaro nga wala kini nagpasabot nga migrabe o mas makatakod ang flu.
