BUTUAN CITY – Wala’y bag-o sa proseso sa 2026 Business One-Stop Shop (BOSS) sa Butuan City government nga gipahigayon sa 2nd Level, Robinsons Place kondiin daghang negosyante ang mikuha ug nag-renew sa ilang business permits dihang gisugdan kini kagahapong adlawa.
Sigon ni Atty Moshi Ariel Cahoy, ang hepe sa City Business Permits and Licensing Department kon CBPLD, gawas lamang sa physical set-up ilabina karon nga mas gamay ang venue tungod sa nagpadayong renovation ug retrofitting sa maong establisamiento human nga na-apektuhan kini sa kusog nga linog ning mi-aging mga buwan.
Ka-uban sa ilang departamento diha sa venue ang taga-Bureau of Fire Protection, Social Security System, Philippine Health Insurance Corporation, Securities and Exchange Commission, PAG-IBIG, Cooperative Development Authority kon CDA ug uban pa.
Padayon usab nga gipatuman ang online application ug online payment isip kabahin sa pagpatuman sa ‘ease of doing business’ law ilabina niadtong mga negosyanteng gusto nang mag-renew sa ilang business permit apan anaa sa layo nga lugar kondiin ang ilang permit, ipadala unya sa ilang email address human sa ilang pagbayad.
Gihangyo usab sa CBPLD ang publiko nga pahimuslan ang online processing pinaagi sa etracs.butuan.gov.ph aron malikayan ang taas nga pila ug mapadali ang pagkuha sa business permits. Dugang pa ni Atty Cahoy, sa Abril 30 ning tuiga ang deadline alang sa pag-renew sa mga business permits kondiin ang Butuan City lang ang nagpatuman niini sa tibuok nasud. Kini aron ma-cater ang mga negosyante ug dili madiskurahe sa ilang pagbubo og puhunan dinhi sa siyudad.
Abli ang BOSS matag-Lunes hangtod Biyernes gikan sa alas 8:00 sa buntag hangtod alas 7:00 sa gabii, ug kada-Sabado gikan sa alas 8:00 sa buntag hangtod alas 5:00 sa hapon.
