BUTUAN CITY – Upat ang kumpirmadong patay samtang anaa sa kritikal nga kondisyon ang usa ka barangay chief tanod human nahulog sa bakilid ang ilang sakyananan kagahapon sa Sitio Monigue, Barangay Mambuaya, sa Cagayan de Oro City.
Gi-ila sa Traffic Enforcement Unit (TEU) ang mga namatay nga sila si Jaime Galarpe, 59 anyos, ug ang asawa niini nga si Elve Galarpe ingon man sila Arlene Liyane ug Richelle Butanas samtang padayon pang gi-obserbahan sa JR Borja General Hospital ang drayber sa sakyanan nga si Barangay Chief Tanod William Jabian.
Migawas sa inisyal nga imbestigasyon nga gikan sa usa ka party sa usa ka resort sa maong dapit ang mga biktima sakay sa usa ka Suzuki Ertiga ug pauli na unta dihang nawad-an sa kontrol ang drayber hinungdan nga milahos pagkahulog ang sakyanan sa pangpang.
Tungod sa kakusog sa impact, nangalagpot ang mga biktima gikan sa sakyanan resulta sa casualties.
Nalangay matud pa sa pag-report ang insidente hinungdan nga nalangan usab ang pag-abot sa mga rescuers kondiin ang mga sakop sa Mambuaya Fire Substation ang unang nakaresponde sa lugar.
