BUTUAN CITY – Gikumpirma sa usa ka senior counterterrorism official, nga mipa-ilalom sa military-style training sa habagatang bahin sa Pilipinas ning mi-aging bulan sa Nobyembre ang mga mag-amahang namusil sa mga tawo sa Bondi Beach, Sydney, Australia nga sila Naveed ug Sajid Akram.
Gikumpirma sa mga security sources nga ang duha, mibiyahe dinhi sa Pilipinas ning mi-aging buwan sa wala pa nila gipamatay ang 15 ka mga tawo atol sa usa ka selebrasyon sa Hanukkah sa Bondi Beach.
Gipagawas kini nga impormasyon human gi-report nga ang 24-anyos nga si Naveed Akram, 2 dugay na matud pang duna’y koneksyon sa mga membro sa pro–Islamic State (IS) network sa Australia — lakip na ang nailang jihadist spiritual leader nga si Wisam Haddad ug ang nahukman na nga IS youth recruiter nga si Youssef Uweinat.
Gikumpirma usab sa Bureau of Immigration sa Pilipinas nga ang duha mi-abot sa nasod gikan sa Australia niadtong Nobyembre 1, ug nagdeklara sa habagatang siyudad sa Davao isip ilang destinasyon.
Sigon ni Bureau of Immigration spokesperson Dana Sandoval, mibyahe sila paggawas sa nasod niadtong Nobyembre 28, sakay sa connecting flight gikan sa Davao City International Airport paingon sa Manila kondiin ang Sydney maoy ilang katapusang destinasyon.
Dugang ni Sandoval, si Sajid Akram misulod sa nasod gamit ang Indian passport, samtang ang iyang anak nga si Naveed Akram misulod gamit ang Australian passport.
Wala pa gikumpirma sa security sources ang insaktong mga lokasyon ug lihok sa duha samtang ania sila sa Pilipinas.
