BUTUAN CITY – Nasakmit ni Justin Kobe Macario ang unang gold medal alang sa Pilipinas sa 33rd Southeast Asian Games nga nagpadayon karon sa Thailand.
Alang kini sa men’s Taekwondo freestyle poomsae individual event nga gipahigayon sa Fashion Island Hall, sa capital Bangkok. Iyang natala ang score nga 8.200 points kansa labaw sa pambato sa host nation nga si Koedkaew Atchariya nga mitala og 8.100 points ingon man ni Ken Haw Chin sa Malaysia nga duna’y 7.740-points. Tungod kay kini ang unang gold medal sa Pilipinas sa SEA Games 2025, usa kini ka dakong morale boost alang sa Team Philippines.
Si Macario, gikan sa University of Santo Tomas (UST), kinsa nakabawi sa iyang mga naunang kampanya human siya naka-silver lang sa Hanoi 2021 ug bronze medal sa Cambodia 2023.
Kini ang iyang ikatulong pag-apil sa SEA Games kondiin hingpit niyang nakab-ot gipangandoy niyang bulawang medalya kansa hugot niyang gipasalamatan.
Aminado siyang lisod ang kompetisyon tungod kay host country ang Thailand, apan iyang gihatag ang tanan aron makuha ang gold.
Ang kadaugan ni Justin Kobe Macario dili lang usa ka personal milestone, apan usa usab ka simbolo sa kusog ug determinasyon samga Filipino athletes nga nagrepresentar sa nasud sa regional stage.
