BUTUAN CITY – Gi-report sa Commission on Audit kon COA nga kapin sa 138-bilyunes pisos nga balor sa mga proyekto sa Department of Public Works and Highways kon DPWH niadtong tuig 2024 ang nalangay o kaha wala mapatuman.
Kini tungod sa kakulang sa plano, engineering ug monitoring, apil na ang daut nga lakat sa panahon, isyu sa road right of way ug dugay nga paggawas sa permit.
Base sa 2024 Audit Report, kapin sa 1,400 ka mga proyekto nga nagkantidad og kapin sa 77-bilyunes pisos, ang wala maka-apas sa deadline samtang laing 523 ka mga proyekto usab, nga nagkantidad og 33.6-bilyunes pisos ang suspendido ug wala pa’y labot sa wala pa masugdi ug terminated na nga kapin sa 600-bilyunes pisos.
Nadiskubrehan usab sa COA ang 1.9-bilyunes pisos nga mga proyektong gideklara nang 100-porsientong kompleto apan depektuso sa gihimong aktwal nga inspeksyon.
Tungod niini, gisugyot sa COA ngadto sa DPWH nga ayuhon pa paggamit sa gikinahanglang proseso ug patubagon ang mga contractors nga wala magtarong sa ilang trabaho.
