BUTUAN CITY – I-apil na karon sa Office of the Ombudsman sa ilang imbestigasyon kalabot sa isyu sa korapsyon sa mga flood control projects si Pangulong Ferdinand ‘Bongbong’ Marcos Jr.
Sumala ni Ombudsman Jesus Crispin ‘Boying’ Remulla, ang tanang indibidwal nga gilambigit ni kanhi Ako Bicol Party-list Representative Zaldy Co sa ₱100-B nga 2025 budget insertions, dili nila isalikway nga tan-awon.
Gawas kang Pangulong Bongbong Marcos, lakip usab sa angyang imbestigahan sila kanhi House Speaker Martin Romualdez, resigned Budget Secretary Amenah Pangandaman, ug kanhi Presidential Legislative Liaison Office Undersecretary Adrian Bersamin.
Aduna na usab matud pay motu proprio investigation ang buhatan alang niini aron masusi ang mga alegasyon ni Zaldy Co.
Gawas niini, gihagit usab ni Ombudsman Remulla si kanhi Congressman Zaldy Co nga mubalik kini sa Pilipinas aron panumpaan ang iyang mga testimonya.
Dihang gipangutana kalabot usab sa kaso ang posibleng atubangon sa Presidente, sumala sa Ombudsman, dili pa kini ang panahon aron kini hisgutan.
