BUTUAN CITY – Gikumpirma ni Carlo Boneto Becera, information officer II sa Office of the Civil Defense kon OCD-Caraga nga wala’y gibilin nga patay o kaha angol ang bagyong Uwan bisan og gipa-ilalom sa storm signal no 1 ang Surigao del Norte ug Dinagat Islands provinces.
Sa eksklusibong pakighinabi sa Bombo Radyo Butuan, gibutyag sa opisyal nga mi-abot sa 159 ka mga barangay ang na-igo sa maong kalamidad nga naka-apekto sa 37,026 ka mga pamilya kon 120,927 ka mga indibidwal.
Sa tumong mga masiguro ang kaluwasan sa tanan, mi-abot sa 135 ka mga evacuation centers ang gibuksan nga gisak-an sa 5,948 ka mga pamilya kon bugti sa 20,459 ka mga indibidwal.
Wala pa kini labot sa 9,588 ka mga pamilya kon 31,854 ka mga indibdiwal nga na-apektuhan usab apan wala namakwit. Kaganinang buntag, gitugutan na sa Philippine Coast Guard ang paglawig sa kadagatan sa Siargao Islands ug sa Dinagat Islands province human nga gitangtang na kagabii ang storm signal.
Samtang cleared na ang kadalanan sa Brgy Taligaman ug Brgy De Oro ning siyudad sa Butuan nga nakatala og landslides rason nga maagi-an na usab kini.
